Медиумите во земјата се поделени во врска со идејата за можни измени на Законот за медиумите.
На денешната дебата во организација на Министерството за информатичко општество и администрација и на Кабинетот на министерот без ресор задолжен за комуникации, отчетност и транспарентност, некои од медиумите оцениле дека нема потреба од измени и дополнувања на Законот за медиумите, а други застанале на ставот дека оваа иницијатива и дебата за утврдување на евентуалната потреба од измени е добредојдена и дека може да приоднесе за подобрување на вкупната медиумска слика во Република Македонија, информираат од прес-центарот на Владата.
Заедничка констатација од дебатата било дека треба да следува период во кој ќе бидат доставени аргументи „за“ и „против“ измени во законот и дека потоа ќе следува уште еден циклус јавни дебати од кои ќе произлезат соодветни одлуки.
Свое обраќање на дебатата имал министерот за информатичко општество и администрација, Дамјан Манчевски, кој го спомнал феноменот лажни вести, кои се генерираат од Република Македонија. Тој нагласил дека за ова прашање нема готови решенија и дека за негово решавање е неопходна потребата од зајакнување на концептот на саморегулација, проверка на фактите и на интензивирање на медиумската писменост.
Министерот без ресор задолжен за комуникации, отчетност и транспарентност, Роберт Поповски, истакнал дека Владата на Република Македонија со подготвеноста да ја отвори оваа дебата на барање на дел од медиумските претставници, нема апсолутно никаква намера да ги ограничи слободите и правата за медиумите што ги гарантира Законот за медиумите.