На 26 јули годинава се навршуваат 50 години од катастрофалниот земјотрес во Скопје, кој зави во црно над илјада семејства во државата, а по 50 години сѐ уште буди потресни слики и сеќавања кај оние што го преживеаја и останаа да сведочат за катастрофата, пишува Нова Македонија.
Исто така, 26 јули е денот кога Скопје почна да се гради и со помош на државите што ни помогнаа прерасна во град на хуманоста и солидарноста. По тој повод годинава градот ќе организира манифестација „50 години од катастрофалниот земјотрес во Скопје“, во која преку јавен повик, објавен во медиумите, се повикани да учествуваат сите заинтересирани државни институции, приватни фирми и невладини организации.
Вера Бошковска, директорката на Универзална сала, вели дека организациите за манифестацијата ќе ги координираат тие, а веќе бил направен и концепт за манифестацијата, во која Скопје ќе се покаже како е модерен, отворен, космополитски, хуман и непосреден град.