Шефот на албанската дипломатија Дитмир Бушати и Државниот комитет за малцинствата вчера се сретнаа со претставници на здруженијата на малцинствата во Албанија, на која присуствуваа и претставниците на здруженијата на македонското малцинство.
Целта на средбата била зајакнување на дијалогот со здруженијата на малцинствата, како и нивно запознавање со препораките на Советот на Европа за ситуацијата на малцинствата во Албанија.
– На средбата беше искажан заеднички став од потребата Рамковната конвенција за заштита на малцинствата и резолуцијата на Советот на Европа, да бидат преведени на јазиците на малцинствата, што подразбира и на македонски јазик, вели Васил Стерјовски, генерален секретар на партијата на Македонците, МАЕИ.
Во текот на средбата, министерот Бушати ја истакнал волјата на албанската Влада за зголемување на соработката со претставниците на малцинствата, нивната вклученост во процесот на консултации за решавање на нивните проблеми, како и за поттикнување и поддршка на нивните активности за натамошна заштита и развој на културниот и јазичниот идентитет на малцинствата.
Според Стерјовски, Албанија во согласност со меѓународните обврски треба да преземе конкретни мерки за заштита на правата на малцинствата.