Министерот за надворешни работи Никола Попоски, денеска во Советот на Европската Унија во Брисел потпиша спогодба со Европската служба за надворешна акција (ЕЕАС) со која нашата земја стана активен и рамноправен учесник во операциите на Унијата за справување со кризи ширум светот.
Како што јавува дописникот на МИА од Брисел, министерот Попоски и генералниот секретар на ЕЕАС, Пјер Вимонт, ставија параф на договорот со кој Македонија, иако не е полноправна членка на ЕУ, сепак активно ќе придонесува во мировните мисии на Унијата, слично како што тоа го прави и во мисиите на НАТО.
– Давате голем придонес во нашите мисијата „Алтеа” во Босна и Херцеговина, а отсега влегуваме во нешто поструктуирано, а тоа е рамка за партнерство која покажува дека вашата земја повеќе од секогаш е важен партнер за нас. Гледам напред кон многуте заеднички авантури кои не очекуваат, во однос на безбедноста и одбраната, но и на другите полиња. Благодарам што ни се придружувате за постојано, потенцираше секретарот Вимонт во името на ЕУ, по потпишувањето на спогодбата.
Министерот Попоски, пак, потенцираше дека спогодбата за соработка во заедничката одбранбена и надворешна политика со Европската унија е долгочекуван момент за Република Македонија, иако нашата земја и досега е активен контрибутор со учеството во мисиите на ЕУ во Босна, Либан, Ирак, Авганистан.