Македонското МНР ја започнало процедурата за продажба на амбасадата на поранешна Југославија во Канбера, имот кој и бил доделен на Македонија во процесот на сукцесијата.
Продажбата на амбасадата се наоѓа во почетна административна фаза, а според МНР средствата од продажбата на овој објект ќе се искористат за купување на нов објект на адекватно место. Македонија се надева дека ќе го продаде објектот за повеќе од еден милион долари.
Македонскиот амбасадор во Австралија, Веле Трпевски за локалните весници изјавил дека објектот на амбасадата бил многу голем, зградата не била реновирана и голем дел од покривот бил оштетен, така што нејзиното користење не било возможно. Зградата исто така не се наоѓала во некое од пропишаните места во Канбера за дипломатски мисии, но била функционална.
Македонските власти во моментов за сопствените потреби изнајмуваат зграда која што ја плаќаат 5.700 долари месечно. Амбасадорот Трпевски исто така додал дека бил во преговори со позната агенција за недвижности, а конечната одлука за продажбата на објектот на поранешната амбасада на СФРЈ во Канбера ќе биде донесен од страна на владата.