Министерот за труд и социјална политика Диме Спасов денеска престојува во работна посета на Виена, каде ќе оствари средби со министерот на Сојузното министерство за труд, социјални прашања и заштита на потрошувачи на Република Австрија Рудолф Џундсторфер.
Како што соопшти Министерството за труд и социјална политика, за време на средбата ќе се потпише меморандум за соработка, со цел продолжување и натамошно унапредување на соработката помеѓу двете земји во областа на трудот и социјалната политика.
– Со потпишувањето и реализацијата на овој меморандум за соработка во областа на трудот и социјалната политика ќе се овозможи размена на искуства и експертиза за поголем број прашања од областа на политиките на вработување и пазарот на труд, безбедност и здравје на работа и трудовата инспекција, системот за социјално осигурување (пензиско осигурување), социјалната нега и заштита, размена на искуства од областа на интеграција на лица со посебни потреби во образованието и вработување на лица со посебни потреби и професионална рехабилитација, стои во соопштението.
Соработката ќе се одвива преку размена на искуства и вештини за тековните состојби во наведените области, но и за стратешките планови во иднина, со цел, се наведува, долгорочно решавање на проблемите и подигнување на квалитетот на животот на граѓаните на Република Австрија и Република Македонија.
Според Министерството, потпишувањето и успешната примена на овој меморандум за соработка ќе придонесе и кон продлабочување и унапредување на односите помеѓу двете држави воопшто.