Претставници на Општина Охрид, на Секторот за комунални дејности, сообраќај и патишта, сообраќајниот инспекторат, на Јавното претпријатие „Охридски комуналец“, на СВР – Охрид со полициските станици Струга, Кичево и Дебар, на Општина Дебрца и претставници на Агенцијата за патишта и на ЈП „Македонија пат“ денеска одржаа координативен состанок посветен на одржувањето на патиштата во текот на зимската сезона што доаѓа.
На ваквите состаноци што се одржуваат секоја година пред почетокот на зимата, се разгледуваат евентуалните проблеми забележани изминатите сезони и се утврдуваат активности за нивно надминување, со цел непречено одвивање на сообраќајот во текот на сезоната кога на сила е задолжителната обврска за поседување зимска опрема.
Како превентивна мерка, СВР – Охрид изработи флаер што ќе ги информира учесниците во сообраќајот за обврските кои ги имаат во текот на зимата. Од СВР – Охрид соопштија дека оваа година значително е подобрена безбедноста во сообраќајот што го потврдува и фактот дека на територија на општина Охрид се случиле 50 сообраќајни незгоди без значителна штета, наспроти 68-те незгоди регистрирани ланската, со позначителна материјална штета.
На состанокот беа презентирани акционите планови на сите субјекти за одржување на локалните и регионалните патишта во зимски услови.
Општина Охрид на тој план предвидува новитети, така што во соработка со Јавното претпријатие „Охридски комуналец“ што е носител на активностите за односниот период, формиран е кризен штаб кој ќе биде во функција 24 часа, со задача да ги следи временските услови и да постапува во согласност со нив. Соопштено е дека обезбедени се потребните количини сол и ризла, како и потребната механизација за расчистување на тротоари и тесни улици, а дополнително ќе бидат вклучени и четири правни субјекти кои, во зависност од ситуацијата и потребите, ќе бидат ангажирани за одржување на патните правци.
Јавното претпријатие „Македонија пат“ од оваа година воведува дежурна телефонска линија на која граѓаните ќе можат да ги пријавуваат критичните точки на кои е оневозможено непречено движење на возилата. Исто така од „Македонија пат“ информираа дека за оваа сезона, навремено се набавени потребни количини на сол и ризла и дека е зголемен бројот на механизација која ќе биде ангажирана за одржувањето на патните правци.
Предложените мерки и заклучоците, како и насоките со кои ќе се подобри комуникацијата во пресрет на зимата, од овај координативен состанок ќе бидат сублимирани во посебен извештај.