Утринава, по повеќечасовна борба со огнената стихија на екипите од Територијалната противпожарна единица од Гевгелија, заедно со вработени од Шумското стопанство „Кожуф“, успееја да го локализираат пожарот што вчера избувна во месноста „Китрос“, Катастарска општина Негорци.
Заради превенција, подрачјето е ставено под 24-часовен надзор на 20-члени дежурни екипи на ТППЕ и вработени на шумското стопанство од Гевгелија.
Пожарот зафати простор од близу 50 хектари на подрачјето на локалниот пат Негорци-Кованец, но и во близина на невропсихијатриската Болница во Негорци. За среќа, изгорена е само нискостеблеста шума, прнари и трња, без полски штети на околните посеви.
Причина за настанатиот пожар е најверојатно човечкиот фактор, поради невнимателното палење на стрништа, но за поконкретен извештај вклучена е и стручна интервенција на инспекторатот на Дирекцијата за заштита и спасување и Полициската станица од Гевгелија.
„Во текот на летните месеци зголемен е бројот на интервенции на противпожарната бригада од Гевгелија. Досега во текот на месец јули и август наши екипи интервенирале во 140 случаи на опожарување, од кои доминантни се пожарите на отворенпростор. Имаме и технички интервенции на опожарени возила, најчесто оние што користат погон на плин (автогас), по една до две интервенции неделно. За среќа, човечки жртви нема, но причинета е поголема материјална штета врз возилата“, изјави заменик-командирот на ТППЕ од Гевгелија, Тони Аџи Николов.
А.Д.