Либерално-демократската партија е згрозена и сериозно загрижена за слободата на медиумите во Македонија, по последниот упад на обезбедувањето на поранешниот премиер и актуелен претседател на ВМРО-ДПМНЕ, Никола Груевски.
Упадот на полициските службеници во просториите на ТВ21, со цел бришење на одредени фотографии кои новинарот на оваа телевизија ги сликал од прошетката на Груевски на улица Македонија, е одлика на автократски и недемократски општества.
Ги прашуваме ВМРО-ДПМНЕ, дали со оваа провокација свесно и намерно ја влошуваат и онака уништената слобода на независното и непристрасно информирање во државата?
ЛДП најсилно го осудува овој чин на насилие и бара санкционирање на припадниците на МВР кои ги пречекориле своите овластувања и ингеренции.
Овој настан е уште еден доказ за издржаноста на барањето на ЛДП за декриминализација и департизација на безбедносните служби од лица со криминално досие, кои работат во служба на партијата, а не на државата.