Концесионерот на македонските аеродроми ТАВ попладнево соопшти дека дојавата за поставена бомба на аеродромите во Скопје и Охрид, „Александар Велики“ и „Свети апостол Павле“ била лажна.
– На бројот за информации на скопскиот аеродром беше добиена дојава за бомба на аеродромите во Скопје и Охрид. ТАВ Македонија постапи во согласност со безбедносните процедури и веднаш го повика анти-терористичкиот тим на МВР кој изврши целосна безбедносна проверка и притоа беше утврдено дека нема причина за грижа, по што и двата аеродроми продолжија со нормалните активности, стои во соопштението од ТАВ.
Од МВР информираа дека по 14 часот на скопскиот аеродром „Александар Велики“ анонимно, засега непознато машко лице се јавило и на лош англиски јазик алармирало дека има поставено бомба на аеродромите во Скопје и во Охрид. Екипи од антитероризам на МВР, согласно процедурите ги презеле сите неопходни мерки, меѓу кои и евакуација на вработените и патниците.
Портпаролот на МВР, Иво Котески за МИА информира дека е проверена новата аеродромска зграда и ништо не е пронајдено. Исто така преземени се мерки и на охридскиот аеродром, каде антитерористичките екипи не пронајдоа ништо сомнително. Полицијата ги презема сите неопходни мерки за утврдување на идентитетот на лицето кое пријавило.