Пратеничката Ане Лашкоска прашува до кога власта ќе ги манипулира земјоделците,особено со откупот на земјоделските производители.
„Ветувавте мед и млеко а ништо не исполнивте, хсос направивте. Имате проблем со откуп на речиси сите земјоделски производи. Дали ќе им помогнете на овоштарите како да се откупат 50.000 тони јаболка“, праша пратеничката Лашкоска.
Министерот за земјоделство, Љупчо Николовски одговори дека на тутунарите им биле исплатени 100 милиони евра. Зголемена била цената на грозје и извозот на вино, а црвената пиперка достигнала највисока цена.
„Паралелно ги решаваме проблемите од претходната власт. Во Ресен не ги обештетивте за штетите. Во 2017 година, исплативме 2 милиони денари за обештетување. Имавме средби со јаболкарите, целосно ќе им бидат исплатени до март субвенциите и премија од 3 денари. За неоткупено јаболко, заеднички ќе ја дефинираме мерката. 45.000 тони јаболко се откупени оваа година. За остатокот што не откупен, а е индустриско јаболко, се работи на изнаоѓање мерки. Се трудиме да обезбедиме пласман на јаболката во Египет. Побарано е сортно јаболко, па ќе се обидеме да ги насочиме производителите да се преоријентираат кон производството на бараните сорти“, рече Николовски.
Лашкоска не беше задоволна од одговорот и порача да престанат со изговори дека ВМРО-ДПМНЕ е виновно за се.
„Поважно ви е шетањето по светските дестинации,отколку решавањето на проблемите на земјоделците. Наместо да ги лажете земјоделците, подобро со министерот за екологија да организирате депонии каде земјоделците ќе ги фрлат скапаните производи“, заклучи Лашкоска.
Габриела Димковиќ-Мишевска