Кандидатот за градоначалник на ВМРО-ДПМНЕ и коалицијата „За подобра Македонија“ за општина Карпош Јагнула Куновска на денешната прес-конференција рече дека во оваа општина родителите плаќаат највисоки ужинки во основните училишта.
Поранешните градоначалници на Карпош, Андреј Петров и Стевче Јакимовски навечер на телевизија се караат кој наместил тендери за Карпош да има највисоки цени за ужинки во основните училишта, а преку ден лицемерно кажуваат дека доколку станат градоначалници ужинките ќе бидат бесплатни. Ова е само едно лицемерие преку кое сакаат да манипулираат со гласачкото тело, истакна Куновска.
Додаде дека во општината Карпош родителите кои имаат деца во основните училишта плаќаат 30 отсто повеќе од децата од другите општини, со што голем дел од родителите не можат да си дозволат нивните деца да се претплатат за ужинки.
– Во Карпош цената на ужинката е 2.400 денари, а во останатите општини родителите плаќаат само 1.800 денари, што би требало да е за 600 денари помалку, истакна Куновска.
Таа рече дека како градоначалник ќе се залага за транспарентни тендери за набавка на ужинки.