Кандидатот за градоначалник на општина Карпош од коалицијата „За подобра Македонија“ предводена од ВМРО-ДПМНЕ Јагнула Куновска најави изградба на нови градинки.
– На територијата на Општина Карпош во моментов има четири детски градинки, од кои две имаат по три, а една свои четири клонови. Во нив се сместени 1.994 деца. Но, во нашата општина, постојат и делови како Нерези, Бардовци, Злокуќани, Жданец, Трнодол каде нема детски градинки. За таа цел во мојата програма, предвидена е изградба на нова детска градинка, заедно со Министерството за труд и социјална политика, рече денеска на прес-конференција Куновска.
Таа додаде дека со реализацијата на овој проект ќе се подигне степенот на заштита на децата и нивното целосно вклучување во процесот на социјализација како есенцијална компонента за правилен психофизички раст и развој.
Изградбата на новата детска градинка, ќе се направи со заеднички финансиски средства на Општината Карпош и Министерството за труд и социјална политика, а рокот за реализација на овој проект е 2016 година.
– Затоа, гласајте за проекти, гласајте за дела. Дадете го својот глас за мене и мојата партија, ВМРО-ДПМНЕ. Дајте свој придонес во конечната промена на власта во Општина Карпош, бидејќи ние ви нудиме проекти и дела кои ќе го подобрат, мои сожители, нашето секојдневно живеење, порача Куновска.