Центарот за култура „Трајко Прокопиев“ во Куманово доби дигитален проектор за прикажување филмови. Современата опрема Центарот ја доби од Филмскиот фонд преку Министерството за култура.
– Опремата е мошне софистицирана. Се работи за современ проектор и модерна 3Д опрема која ќе се користи за прикажување филмови, изјави директорот на Центарот за култура Роберт Павлевски.
Опремата е доделена на времено користење по аплицирањето на кумановскиот Центар за култура до Филмскиот фонд. Опремата е поставена во големата сала која има капацитет од 660 седишта. Од март годинава, според најавите на надлежните, опремата ќе се користи за прикажување филмови. Кумановци ќе имаат можност да проследат по најмалку два филма месечно.