Охридската полиција поднесе кривична пријава против неколку лица од Охрид поради учество во тепачка во која било употребено и ладно оружје, со нанесени телесни повреди.
Станува збор за лица 22-годишниот А.А. од Охрид, приведен поради постоење основи на сомнение за сторено казнено дело „тешка телесна повреда“. Со кривичната пријава се опфатени уште и лицата Н.Б. (23) Д.Н. (22) Ѓ.Б. (20) и А.Л. (25) сите од Охрид поради постоење основи на сомнение за сторено казнено дело „учество во тепачка“. На сите пријавени од страна на истражен судија при Основниот суд во Охрид им е одредена мерка притвор во траење до 30 дена.
Тепачката се случила на 6 мај околу 3 часот на пешачката патека меѓу ноќните клубови „Кадмо“ и „Куба Либре“ во близина на Охрид. На инцидентот му претходела расправија меѓу две лица во во ноќниот клуб „Кадмо“, по што пријавените биле отстранети од клубот.
При повторна средба на патеката пред клубот, расправијата прераснала во тепачка. Притоа првопријавениот А.А. со нож му нанел повреда во стомакот на М.Р. од Охрид по што замавнал кон С.С. од Охрид повредувајќи го во десната подлактица. По нападот со нож, А.А. побегнал од местото на настанот.
