Секторот за внатрешни работи Велес во соработка со надлежното обвинителство поднесе кривична пријава против лицата Б.Е. (33), И.У.(34) , Б.М. (34) и Ф.Е. (28) од Градско, поради основи за сомнение дека сториле кривични дела „противправно лишување од слобода“ и „разбојништво“.
Портпаролот на СВР Велес, Анита Стојковска изјави дека четворицата осомничени на 16-ти септември годинава околу 01:00 часот во близина на железничката пруга во Градско пресретнале четири странски (сириски) државјани.
При тоа заканувајќи им се со земјоделски алати (срп, коса и вила) насилно ги внеле во куќата на првопријавениот каде ги задржале околу еден час, им одзеле 325 евра, 700 денари и три мобилни телефони, по што ги избркале од куќата.
Пријавените во текот на вчерашниот ден се изведени пред надлежен суд, при што им е изречена мерка притвор во траење од 30 дена. Лицата се спроведени во Истражен затвор Скопје, информира Стојковска.
