Белата книга на одбраната, како стратешки документ, наместо на албански јазик, прво требаше да се објави на македонски јазик, а дури потоа да се преведува. Ова го изјави началникот на Генералштабот на АРМ, генерал-мајор Горанчо Котески.
Котески не беше присутен на презентацијата на документот, што во понеделникот ја одржа министерот за одбрана Фатмир Бесими.
„Сметам дека содржината е во ред. Но, имаме различни ставови во однос на техничката изработка. Службен јазик во АРМ е македонскиот, и мислам дека треба печатената верзија да биде објавена на македонски, па потоа да биде преведена на јазиците за кои има потреба. Тоа е стратегиски документ, не е туристичка публикација. Поради тоа не бев на презентацијата”, изјави Котески, според кого во АРМ нема место за политички импровизации.
Тој го известил министерот за одбрана за своето мислење, а информираше и дека поднел иницијатива за дисциплинска постапка за четворицата униформирани припадници на АРМ кои го придружуваа министерот Бесими во полагањето цвеќе на споменикот на ОНА во Слупчане.