Во рамки на планираните превентивно-репресивни активности за поголем ред и безбедност на сообраќајот, викендот што измина во Гостивар е спроведена уште една од серијата акциски контроли, со која се опфатени моторциклистите, односно како и колку тие ги почитуваат сообраќајните правила и прописи.
При контролите на триесетина моторциклисти, биле констатирани 21 прекршок, информира денеска Марјан Јосифоски портпарол на СВР Тетово.Десет од нив управувале без возачка дозвола или потврда, двајца без валидна регистрација, шест лица управувале без заштитни кациги, а констатирани се и 3 други прекршоци.
– На сите прекршители, изготвени и врачени им се петнаесет платни налози и шест покани за наплата на глоба. Петнаесет моторцикли веднаш се исклучени од сообраќај. Засилените контроли ќе продолжат до крајот на овој месец.Посебно внимание ќе му биде посветено на пребрзото возење, управувањето под дејство на алкохол и недавањето првенство по гостиварските улици, но и на околните регионални и локални патишта, рече Марјан Јосифоски, портпарол на СВР Тетово.
Годинава, заклучно со денеска, на подрачјето на Гостивар и Гостиварско вкупно регистрирани се 209 сообраќајни несреќи. Најмногу од несреќите се случиле на градските улици и на магистралата Гостивар-Кичево. Најчеста причина е неприлагодена брзина според условите на патот.
Во овој период реализирани се над 4.000 контроли, во кои учествувале, односно ги спровеле службеници на гостиварското Полициско одделение за безбедност на патниот сообраќај. Во изминатите осум и пол месеци од годинава, изготвени и врачени се 1.312 платни налози и 1.529 покани за наплата на глоба.
