Во општина Гевгелија денеска беше формиран локален Совет за превенција, со цел остварување на соработката и зацврстување на влијанието на јавноста во работата на полицијата, за утврдување заеднички препораки за подобрување на јавната безбедност во општинатата.
Во Советот членуваат претставници на сите државни органи и институции, Советот на општина Гевгелија, образованието и невладиниот сектор, а негова цел ќе биде градење доверба и партнерски односи во превенирање на појавите кои влијаат на јавната безбедност и безбедноста на сообраќајот на патиштата.
– Наша задача е превентивно да расправаме и утврдуваме насоки за одредени значајни општествени појави и дејствувањето на безбедносните и други надлежни органи. Прва задача ќе ни биде донесувањето на Акционен план за работа што наскоро ќе го направиме. Во овој период, април-мај, е предвидено разгледување на извештајот за состојбата околу употребата на наркотици и психотропни супстанци кај младите во општината по кој ќе треба да се произнесеме затоа што голем број граѓани реагираат за присуство на младите под 18 години во кафулињата по полноќ и служењето алкохол, рече градоначалникот Сашо Поцков.
Покрај ова нагласи Поцков без оглед што за сега нема опасност од повторување на бегалската криза, ќе се посветиме и на моментната состојба околу илегалните преминувања на границата од страна на мигрантите и можните предизвици оти безбедноста на граѓаните во општина Гевгелија е обврска за сите нас.