Судии, јавни обвинители, адвокати и претставници од правосудните академии од Македонија, Србија, Хрватска, Босна и Херцеговина, Словенија и Косово, денеска и утре, ќе учествуваат на регионалната конференција за „Реформите на кривичниот систем во регионот: Предизвици, трендови и воспоставување на адверзијален систем на кривична постапка“.
Дводневната конференција е организирана во рамки на воспоставената долгогодишна соработка и потпишаниот меморандум за соработка меѓу Академијата за судии и јавни обвинители „Павел Шатев“ и Правосудната Академија на Косово, во соработка и со финансиска поддршка на Мисијата на ОБСЕ во Скопје и Мисијата на ОБСЕ во Косово.
Целта на конференција е да се разменат компаративните искуства на земјите учеснички од регионот, најдобрите практики од имплементацијата на новиот Закон за кривичната постапка, предизвиците и трендовите кои се појавуваат, како и промената кон адверзијалните форми на кривичната постапка.
Поздравни обраќања на конференцијата ќе имаат директорката на Академијата за судии и јавни обвинители „Павел Шатев“ Анета Арнаудовска, директорот на Правосудната академија на Косово Лавдрим Красниќи, јавниот обвинител во Јавното обвинителство на Република Македонија Лилјана Спасовска и претседател на Управниот одбор на Академијата за судии и јавни обвинители „Павел Шатев“, судијата и заменик претседател на Врховен суд на РМ Фаик Арслани и претседателот на Адвокатската комора на РМ Никола Додевски.