Подобрување на транспарентноста на управните постапки и зголемување на довербата во јавната администрација, се меѓу целите на Предлог законот за општа управна постапка, во прво читање, за кој денеска треба да расправа собраниската Комисија за политички систем и односи меѓу заедниците.
Со предлог законот, според образоложението, треба да се воспостави целосен и сихнронизиран систем на управна постапка, да се поттикне управна пракса ориентирана кон услугите и професионална јавна администрација како суштински услов за економскиот развој, да се поддржи ефективното и етичкото однесување на државните и јавните службеници во заштитата на јавниот интерес, да се подобри ефикасноста (економичноста) на донесувањето на управните акти во корист и на јавниот интереса и интересот на граѓаните…Воедно со законот се трасира патот да се започне со примена на современи информатичко-комуникациски технологии за испорака на административните услуги (е-администрација), како и да се усогласи македонската јавна администрација со стандардите на ЕУ.
На дневен ред на Комисијата за политички систем се и предлог законите за дополнување и за изменување на законите за судска служба, за извршување на санкциите, за управната инспекција и за инспекциски надзор, во прво читање.
Во Собранието за денеска се закажани и седници на комисиите за труд и социјална политика и за земјоделство, шумарство и водостопанство.
Пред членовите на Комисијата за труд и социјална политика се предлог измените и дополнувањата на законите за работни односи, за социјалната заштита, за инспекцијата на труд и за превенција, спречување и заштита од семејно насилство, сите во прво читање. Членовите на Комисијата за земјоделство, шумарство и водостопанство, пак, треба да расправаат за предложените измени и дополнувања на законите за шумите, за ловството, за Државниот инспекторат за земјоделство, за шумарска и ловна инспекција, за безбедност на храната за животни, во прво читање.