Во изборната програма на Коце Трајановски за 2013- 2017, се наоѓаат предизборни ветувања кои требале да бидат остварени за изминатиот четиригодишниот мандат.
Во своето обраќање Трајановски вели дека преку секојденевната непосредна комуникација со граѓаните реализирал повеќе од 500 проекти во главниот град. Во програмата од 2009 година тој предложил 200 проекти.
Трајановски тогаш ветил дека ќе се изврши целосна реконструкција на Универзалната сала во 2009, а во новата програма не се споменува нејзината реконструкција туку само продолжување на финансиската поддршка и програмските активности.
За Универзалната сала имаше неколку најави дека ќе се реконструира, но остана стариот изглед. Градскиот парк според ветувањата во 2009 својот нов лик требал да го добие во 2010 година, а неговата реконструкција е дел од сегашните 227 нови проекти за 2013- 2017. Ветеното проширување на булеварот „Цветан Димов“ требало да се случи до 2013, а во новата програма неговото проширување е предвидено за перидот од 2014- 2017.
„Ние докажавме дека може да се вети и да се оствари ветеното, без да се излажат граѓаните. Делата говорат за нашето посветено работење во град Скопје. Во новата програма за Скопје за период 2013- 2017 година предвидов уште многу нови проекти, земајќи ги во предвид вашите потреби, вашите сугестии, вашите предлози “, стои во обраќањето на Трајановски.
Во програмата за 2013- 2017 чијшто носител е Трајановски, под името на еден проект се обединети две или три ветувања од 2009 година. Проектите кои го промовираат Скопје како бизнис дестинација (Проект: Маркетинг-програмата за домашни и странски инвеститор, Проект: за промоција на Скопје како бизнис-дестинација) во новата програма се претставени по едно име како Проект за промоција на Скопје како деловна дестинација.
Темјана Поповска