Објавена е ранг листата со бодувања за идни членови на Државната комисија за спречување на корупцијата. Според оваа листа, веќе станува се поизвесно кој ќе влезе во составот на идната Антикорупциска комисија, која ќе биде со проширени надлежности, а се очекува да работи независно.
Најдобро се оценети досегашните кадри од ДКСК, Владимир Георгиев, дипломиран економист од Скопје кој беше државен советник во комисијата и Софка Пејовска Дојчиновска, генерален секретар.
Понатаму следува Катица Николовска, дипломиран економист од Велес, Нури Бајрами од општина Гостивар, Билјана Николовска, дипломиран економист од Скопје која е можно да биде и идниот претседател, Горан Трпеноски, новинар од редакцијата на „Сакам да кажам“ и Шемши Салаи, дипломиран правник. Високо на листата котираат и Владимир Клековски и адвокатот Рахамин Мизрахи.
Ранг листата утре ќе се најде пред комисијата за избори и именувања, која треба да одлучи кои седум антикорупционери ќе бидат избрани од пријавените 80, а селектираните 57. Собранието потоа треба да ги гласа на пленарна седница, по што тие ќе дадат свечена заклетва и ќе почнат на работните места.
Мери Јордановска