„Довербата што ми ја укажаа моите сопартијци нема да ја изневерам и ќе направам се што е во моја моќ да го воздигнеме Штип и да го претвориме во една урбана и модерна општина“, изјави Здравко Коцев, кандидат на СДСМ за градоначалник на Општина Штип.
Штип, рече, не може да стане урбана и модерна општина ако има болница која се распаѓа, ако нема никаква надеж за развој на индустриската зона и ако нема ни трага, ни глас од инвеститори.
„Иако оваа Влада е позната по поставување фасади и шминкање на градови, воопшто не обрна внимание на штипските тротоари и улици“, рече Коцев.
Вети изградба на мост на реката Брегалница кој ќе го поврзат Сењак со индустриската зона,ќе ги намалат трошоците на граѓаните со тоа што ќе го гасифицираат Штип, ќе изградат и регионална депонија „Трештена скала“ која ќе служи за рециклирање на сметот и ќе ги реконструираат улиците и тротоарите во Штип.
Ги повика штипјани на утрешниот митинг на кој ќе се покаже дека Штип не е на ВМРО-ДПМНЕ, дека Штип, како што изјави, не е и нема да биде заложник на фамилијата и дека Штип нема да биде управуван од овој режим.