Малолетната ќерка на обвинетиот гостиварски полицаец Јаким Трифуновски кој во февруари годинава уби двајца соседи на паркинг во Гостивар, изјави: „Татко ми ме бранеше од насилници“.
Изјавата девојчето ја кажало пред лекари во психијатриска болница кои оцениле дека 10-годишното дете е интелигентно, раскажувало детали за настанот, не фантазирало, ниту, пак, измислувало, објави „Нова Македонија“.
„На почетокот на разговорот со стручните лица, девојчето било вознемирено, но, потоа се опуштило и почнало детално да го раскажува настанот. Според девојчето, непознатите се фрлиле да го тепаат нејзиниот татко, па тој се обидувал да ја заштити и одбрани. Вештаците утврдиле дека девојчето паметело многу детали и дека не фантазирало, ниту измислувало“, се наведуваат делови од исказот.
Лекарите утврдиле дека во моментот кога нападнал, полицаецот Јаким Трифуновски бил пресметлив, но, тој реагирал со голем афектен страв, па неговото однесување било окарактеризирано како импулсивно.
