Инвестиции во локалната патна инфраструктура за меѓусебно поврзување на селата Џепин – Ливада – Делогожда – Ново Село, но и со регионалниот пат, реконструкција на улица во селото Велешта, како и изградба на тротоар од влезот на селото Враништа до село Таш Маруништа се приритет за изградба и реконструкција на локални патишта во општина Струга за 2013 година.
Паралелно со овој проект опфатено е и поврзување на селата Мороишта и Мислешево и нова патна инфраструктура меѓу дримколските села Безево и Јабланица.
За Никола Затуроски, член на Советот на општина Струга од коалицијата „Заедно за Струга“ неопходно е подобрување на локалната патна инфраструктура.
– Посебно е значајна изградбата на тротоарот на потегот од реката Шум низ селото Враништa, па се до влезот на Таш Маруништа, пред се поради безбедносни причини, рече Затуроски потсетувајќи дека на овој пат минатиот месец имаше две жртви.
Струшките советници на последната седница ја истакнаа и потребата од продолжувањето на интензивните инвестиции во патната инфраструктура во општина Струга, која, според нив, ќе значи придобивка и за граѓаните, но и за развојот на општината.