На Водно треба да се гради нов туристичко скијачки комплекс, кој ќе содржи четири ски-патеки, три ски-лифта, подвижни теписи, административна зграда со ресторан, ски-рента и школа, гаража за ратрак и санки со сервис, прва помош, ски-патрола и друго. Ова треба да го изгради новиот концесионер за скијачкиот град на Водно за кој е предвидено е да се гради лево од Милениумскиот крст, од врвот кон Нерези.
Комплексот е предвидено да функционира како посебна понуда на градот Скопје и во зима и во лето.
„Тој ќе биде обележје за промовирање на Скопје, за подобрување на туристичката понуда и за создавање квалитетен простор за развој на рекреативниот и професионалниот спорт. Современо дизајниран модерен скијачки комплекс што ќе ги задоволи највисоките светски стандарди за ваков вид објекти и обезбедување соодветен квалитет на услуги во согласност со стандардите на ЕУ,“ стои во образложението на предлог-одлуката на Советот на Град Скопје.
Градот ќе почне постапка за доделување договор за јавно-приватно партнерство за изградба, управување, користење и одржување на ски-патеките на падините на Водно. Договорот со приватниот партнер ќе се склучи за период од 25 години.