Ќе се додели концесија за уште една национална телевизија, според Советот за радиодифузија. Одлуката за конкурс за национално емитување од страна на нов концесионер не помина мазно, информира Телма.
Според Советот за радиодифузија деновиве ќе бидат објавени конкурси за доделување дозволи за вршење на оваа дејност преку терестријален предавател. Обезбедени се и сите претпоставки, има слободни фрекфенции, а потребата од нови радиодифузери е потврдена и со посебна анката меѓу публиката.
– Една од причините е и финансискиот аспект. Во изминатиот период одземавме повеќе дозволи, поради што веќе ги чувствуваме економските импликации – рече Зоран Трајчевски, претседател на Совет за радиодифузија.
– Новиот телевизиски програмски сервис на државно ниво ќе биде на македонски јазик, со претежно забавен, општ формат. Зошто токму ваков формат? – реагираше Столе Наумов.
Според него, во овој период ни се потребни повеќе разновидни информативни програми, пренесува Телма.
Според условите во конкурсот, во програмскиот сервис треба да доминираат видовите програми што претежно исполнуваат забавна функција: забавна, забавно – информативна, играна, спортска, музичка програма, игри, реално шоу.
Во вкупната програма забавната функција не смее да биде застапена со помалку од 50 отсто, ниту со повеќе од 65 отсто, а образовната и информативната не смеат да бидат застапени со помалку од 5 проценти.
Според Советот за радиодифузија има заинтересирани за оваа дозвола, но не откриваат дали меѓу нив има медиуми кои веќе емитуваат програма преку кабелските оператори, или преку сателит.