Кандидатот за граночалник на СДСМ за Кавадарци, Бетиан Китев се заложи за гасификација на Кавадарци. Според него, може да се донесе гас за домаќинствата, за производствените погони на фирмите и за општинските згради и училиштата.
„Гасификацијата на Кавадарци не е само желба, туку приоритет за развојот на оваа општина. На тој начин, по примерот на Струмица и Куманово, не само што радикално ќе ги намалиме трошоците на граѓаните, туку и трошоците на општината, а парите ќе можеме да ги инвестираме на друго место. Гасификацијата како резултат на намалените трошоци за производство е основа и за локалниот економски развој со што ќе се створат услови за отворање на нови работни места“, рече Китев.
Тој вети дека дека ќе се залага за нов и модерен зелен пазар, катна гаража во централното градско подрачје, конечно решавање на водоснабдувањето, активно вклучување на општината во меѓународната промоција и афирмација на тиквешкото вино и грозје, враќање на сјајот на манифестацијата тиквешки гроздобер подобрување на условите за живот во селата и развојот на туризмот.
Китев ги повика жителите на Кавадарци да дојдат на утрешниот митинг на опозицијата со што ќе покажат дека не се согласуваат со актуелната ситуација и дека сакаат промени.
„Овдешните луѓе знаат дека вчерашните 2 денари повеќе за откуп на грозјето се само мала утеха за поскапените трошоци за производство. Сè поскапува неколкукратно, само трудот на лозарите, земјоделците и работниците не поскапува. Сè поскапува, само откупната цена на земјоделските производи не. Најлошото е што од година во година се повеќе се намалуваат површините покриени со лозови насади“, рече тој.