Националните ТВ станици Канал 5, Сител и Алсат – М денеска најавија дека веќе нема да емитуваат домашна музика бидејќи „не вродиле со плод нивните аргументи оти ТВ станиците не користат фонограми, туку аудио-визуелни дела, (видеограми), за кои Македонска Музичка Индустрија – ММИ, нема добиено лиценца“.
Трите национални телевизии во заедничко соопштение по денешната средба посочуваат дека ММИ не ги прифати многуте забелешките на Министерството за култура од 17 декември 2012 година и не ги коригираше, а згора на тоа деновиве достави известување до ТВ куќите дека со почеток на оваа година ќе почне со побарување на средства.
Националните телевизии бараат Министерството за култура да ја одземе лиценцата на ММИ и да ја преиспита одлуката, според нив, за самоволно истакнување тарифи, како и вршење притисок врз медиумите за плаќање дополнителни давачки. – Истовремено препорачуваме, во духот на заложбите на Владата на РМ, за намалување на давачките кои ќе го оптоварат буџетот на граѓаните и фирмите, да се одложи доделувањето нова лиценца, за да се амортизира штетата која ќе се направи не само врз македоската музичка продукција, туку и врз сите правни и физички лица во време на економска криза, соопштуваат трите национални телевизии.
Тие информираат и дека почнуваат постапка пред Уставниот суд во која ќе бараат да се преиспитаат сите акти на ММИ. Мораториумот за емитување домашна музика, најавуваат, ќе остане во сила до конечната разврска на случајот.