По повод патрониот празник на Домот за деца без родители и родителска грижа „11 Октомври” од утре до 10 октовмри ќе се одржи кампања за собирање средства за изградба на стаклена градина за штитениците на Домот.
Ристенка Атанасовска, директор на Домот „11 Октомври” изјави дека се задоволни што, конечно, почнува кампањата за реализација на овој проект со кој децата ќе добијат модерна ботаничка градина каде ќе можат самите да посадат и да одгледуваат овошје и зеленчук.
– Ова е убав начин да го научат целиот процес на нивно одгледување, а воедно и да се одговорни – да се грижат за нешто што самите го посадиле. Затоа, апелираме до сите правни и физички лица да се вклучат во кампањата, како би можеле оваа наша дамнешна желба, да ја реализираме, изјави Атанасовска.
Министерството за труд и социјална политика е првата државна институција, која ја поддржа кампањата.
– Веруваме дека ова е одлична прилика, сите оние кои се во можност, да донираат за изградба на стаклената градина за децата од Домот „11 Октомври”. Министерството за труд и социјална политика ја поддржува оваа акција, која покрај општествено одговорниот карактер, кој компаниите и физичките лица ќе можат да го демонстрираат, ќе донесе и многу насмевки од овие деца, кои се навистина бесценети, изјави министерот за труд и социјална политика, Диме Спасов.
Целата активност ќе заврши на 10-ти октомври, со голема “грил забава” во дворот на Домот, подготвена од децата, на која ќе бидат додеделни благодарници за сите донатори, како и на медиумите за нивната поддршка.