Голем камен со дијаметар над еден метар денеска околу 14 часот се стркалал од тетовското Кале и удрил и оштетил ѕид од куќата на семејството Стаменковиќ на улицата „Истра“ во Тетово откако претходно се одбил од потпорен ѕид на куќа на улицата „Вукашин Симоски“ по што продолжил да се тркала надолу.
Во инцидентот нема повредени лица, но причинета е поголема материјална штета, информираше портпаролот на СВР Тетово, Марјан Јосифовски.
Според неговите информации каменот се стркалал од просторот во близина на предавателот на Телевизија „Кисс“, поставен на тетовското Кале.
Полициски службеници на СВР Тетово на посоченото место првично утврдиле дека на земјиште, сопственост на Д.Ф ( 23 ) од Тетово, непосредно пред тоа се изведувале градежни работи. Камењата со багер се товарале во камион, а потоа се истоварале во близина.
– Сопственикот на парцелата,управувачот на багерот и камионот набрзо се обезбедени и ќе се разговара со нив. Во тек е увид и ќе се расветлуваат сите поединости околу тоа од каде е изваден каменот и како се стркалал по надолницата и ги причинил оштетувањата, но и колку вкупно се проценува штетата, рече Јосифовски.