„Зошто на 22.02.2019 давате непостоечки еден милион евра спакувани во ташна Луј Витон?”, го праша обвинетиот Бојан Јовановски, сведокот Орце Камчев на продолжението на седницата за случајот „Рекет“.
„Јас одлучив да ги исплатам парите за да се тргне лагата за мене“, рече Камчев пред судот и дополни дека парите од 1 милион евра не се непостоечки.
„Дали свесно ја игравте улогата на агент-провокатор за да ги информирате вашите странски пријатели“, праша Јовановски, алудирајќи на тоа дека сведокот се обидел да изврши шпионажа, но судот не дозволи Камчев да одговори на прашањето.
На следно прашање дали Камчев свесно го наведувал Јовановски да спомнува имиња на политичари пред него за да го сними, Камчев рече дека не и дека свесно не го наведувал на ништо, и потоа бизнисменот возврати со контра-прашање до обвинетиот: „Свесно ли те наведов да ја носиш Јанева на операција да си ја смали килажата“, му рече Камчев на Јовановски пред судот.
Судењето продолжи со испитување на Камчев кој е сведок на Обвинителството.