Работници рачно го дупчат асфалтот на се уште непуштениот во употреба булевар „Борис Трајковски“ поради грешка во изведбата. Проширениот и реконструиран булевар треба свечено да биде пуштен во употреба на 8. септември и затоа од една страна се подготвуваат ленти за свечено пуштање во употреба, а од друга страна работници набрзина бараат под асфалтот каде е грешката.
Според жителите на потегот на булеварот, сега канализацијата прелева во куќите и се шири лош мирис што упатува дека е направена грешка при поставување на цевките.
Во декември 2015 година тогашниот премиер Никола Груевски и скопскиот градоначалник Коце Трајановски го означија почетокот на третата фаза од проширувањето и реконструкцијата на булеварот „Борис Трајковски“.
Се работи за реконструкција и проширување на скопската сообраќајница на потегот од фабриката Стаклара до влезот во населбата Пинтија. Градежните работи како што тогаш беше најавено беа предвидени да траат 18 месеци и да опфатат проширување на коловозот од две на четири сообраќајни ленти, пешачки патеки од двете страни на коловозот и велосипедска патека.