Јавното претпријатие „Комуналец” од Кичево апелира до граѓаните да не фрлаат старите покуќнини и градинарски овоштарски отпади во контејнерите или покрај него, бидејќи тоа не е комунален отпад.
– Комуналниот отпад е неопасен и се создава од физички лица, како и комерцијалниот отпад. Но треба да се знае дека старите покуќнини и градинарски овоштарски отпади не спаѓат во комунален отпад и истите нема да бидат подигнати, велат во денешното соопштение од ЈП „Комуналец”.
Доколку граѓаните имаат ваков отпад, како што посочуваат од „Комуналец”, треба посебно да се пријави и за таа услуга дополнително се наплатува.
– Во случај ако граѓаните и правните лица не се придржуваат на законските одредби, тогаш општинскиот комунален инспектор, униформираните полициски службеници и комуналниот редар се должни на сторителот на прекршокот да му поднесат пријава или да му изречат глоба, се наведува во соопштението.