Актерот Владо Јовановски на протестот „За заедничка Македонија“ од Охрид кажа дека денеска се протестирало во 33 града во државата, а бројката не била случајна.
– Во 33 други градови низ Македонија, не случајно е бројката 33, туку Македонија во Бибилијата е спомната ни повеќе ни помалку туку 33 пати. Тоа се годините кои ги живееше спасителот наш на земјата Исус Христос, толку се и пршлени на рбетот во човековото тело. Не само во 33 градови, моето чувство е дека цела Македонија ќе стане и излезе на улиците бидејќи граѓаните станаа свесни дека ако сега не се на улиците, цел живот ќе бидат уличари без свој дом.
Сега е вистинското време кога треба нашата заедничка куќа, ние македонскиот народ и сите граѓани на РМ кои припаѓаат на сите етникуми, да излеземе и да кажеме „стоп“ за разградување на нашата етничка Македонија. Видете луѓе, мене ми е прекрасно на сцена, но што ми вреди сцената и мојата прекрасна професија ако ја изгубиме Македонија, рече Јовановски.