Актерот Владо Јовановски, eден од оние кои со толпата влетаа во Собранието, при што беа повредени пратеници, новинари и сниматели, на својот Фејсбук профил се обидува да се оправда дека не повредил никого, и никому не сторил ништо лошо. Според него додека бил во Собрание, изнесувал повредени и давал вода на полицајци.
Тој пишува дека откако се вратил од селото Слепче, каде што читал стихови за новопрогласениот светител Свети Кипријан Слепчански, се шокирал кога го отворил својот Фејсбук и ги прочитал коментарите со осуда за него.
„Ме осудиле и уште да ме запалат ако можат, без разлика што не сум сторил никому ништо лошо. Нит сум повредил некого ниту го одобрувам насилството. Ако е грев да изнесеш повреден или колабиран човек од општ хаос, тогаш е во ред. Или ако е грев тоа што во неколку наврати им давав вода на полицајците, на врата и тоа е во ред. Или тоа што се дерев таму да ме чујат со апели да нема насилство. Како и да е, само на злобниците кои од ново ме стрелаат, ќе им кажам само да не ме жалат мене, туку да се жалат себеси“, напиша Јовановски.
Актерот Јовановски е меѓу лицата од толпата за кои МВР бара притвор поради организирање на протестите и нападот на Собранието во четвртокот заедно со Борис Дамовски, Богдан Илиевски и Игор Дурловски.
Актерот Владо Јовановски, познат како наратор во владините реклами „Ех моја чудесна Македонијо“, на 15 февруари напиша дека војна ќе има и прашува колку чини пластичен експлозив на црниот пазар.
Еве што тогаш напиша Јовановски:
„Фауст од Муртино потпишал! Своерачно го потпишал договорот. Го потпишал со крвта на загинатите бранители, од сегашните и минатите војни. На тој слуга, гласот му го дадоа триста и педесет илјади заблудени граѓани. Има и такви кои велат дека ѓаволот ги измамил, дека биле несвесни. Како и да е, после е..ње нема каење. Само, штетата што ја направи таа црпка е голема. ЌЕ ИМА ВОЈНА! НОВА ВОЈНА ЌЕ ИМА! ЦРПКООО, НИКОЈ НЕ САКА ВО ТВОЈАТА КОЖА ДА БИДЕ!
КОЛКУ ЧИНИ КИЛО ПЛАСТИЧЕН ЕКСПЛОЗИВ НА ЦРНИОТ ПАЗАР“