Министерката за внатрешни работи на Република Македонија, Гордана Јанкулоска денеска отпатува за Сараево,каде што ќе учествува на меѓународната конференција насловена „Безбедноста на Балканот, технологии и образование – предизвици во рамки на компјутерската инфраструктура“, што утре ќе се одржи во организација на босанското Министерство за внатрешни работи и Американскиот универзитет во Босна и Херцеговина.
На оваа конференција покрај министерката Јанкулоска ќе учествуваат и министрите за внатрешни работи на Хрватска, Црна Гора, Србија, Турција, Албанија, БиХ, како и претставници на американската ФБИ, на Советот на Европа, НАТО, институтот „Џорџ Маршал“ и други.
Предвидено е министерката Јанкулоска да има свое обраќање на посочената тема. На маргините на конференцијата министерката за внатрешни работи Гордана Јанкулоска ќе има билатерални средби со своите колеги од Србија и Турција.