Катица Јанева не е сместена во хашкото одделение на затворот „Скопје“ во Шутка, бидејќи таму повеќе од 30-денови се наоѓа Бојан Јовановски познат како Боки 13 кој е осомничен во истиот случај каде е и Јанева. Управата на затворот за „А1он“ вели дека тоа е стандардна процедура на постапување. Оттаму додаваат дека здравствената состојба на Јанева е третирана според прописите кои затворот ги има, не коментирајќи дали таа има нарушено здравје.
„Затворската управа направи проценка. Таа е сместена во затворот, но согласно процедурите, да нема контакт со другите осомничени лица во истиот случај. Утрово е однесена на здравствен преглед кај лекар. Ние стоиме зад тоа дигнитетот и интегритетот на овие лица да се зачува“, велат од Управата на затворот „Скопје“.
По прегледот кај затворскиот лекар, Јанева во придружба на полицијата е испратена за Гевгелија, за да присуствува на погребот на нејзината мајка која почина вчера.