Кандидатот за градоначалник на општина Карпош од ВМРО-ДПМНЕ и коалицијата „За подобра Македонија“ Јагнула Куновска денеска најави дека талентираните спортисти и ученици ќе добиваат по шест илјади денари месечно во рамки на проектот „Општината ги стипендира најдобрите“.
– Досега се даваа од две до четири илјади денари месечно за најмногу 110 деца. Во нашиот проект предвидовме 100 процентно зголемување. Талентираните спортисти и ученици ќе добиваат по 6 илјади денари месечно, рече на денешната прес-конференција Куновска.
Проектот ќе се реализира во периодот од 2013-2017 година, а од општинската каса ќе се издвојат шест милиони денари, распоредени во 10 месеци.
– Децата ќе земаат стипендија од 1 септември до 20 јуни секоја година. Целта на овој проект е да го поттикнеме засилувањето на свеста кај граѓаните за значењето на образовниот процес и спортот. Со тоа ќе создадеме здрави и образовани поколенија, рече Куновска.