Проектот „Изнајми велосипед“ за оваа сезона завршува в петок, информира ЈП Градски паркинг – Скопје.
Оттаму велат дека за време на зимскиот период скопјани нема да можат да изнајмат велосипед.
Проектот „Изнајми велосипед“ е во функција 6-7 месеци од годината. Се става во употреба во оној миг кога тоа ќе го дозволат временските услови, на пролет, а завршува на 31 октомври секоја година.
Основан е во заедничка соработка на градот Скопје, Јавното претпријатие Градски паркинг- Скопје и Здружението на граѓани Еко Свест, во јули .2010 година. Негова примарна цел е велосипедот да се користи како превозно средство, особено во централното градско подрачје.
Покрај тоа, целта на проектот е велосипедите да се употребуваат за рекреативни и туристички потреби, како и за подигање на јавната свест за промена на навиките на граѓаните за употреба на алтернативни средства за јавен транспорт.
Јавното претпријатие Градски паркинг- Скопје располага со 120 велосипеди кои можат да се изнајмата на четири локации – на јавното паркиралиште Треска, на јавното паркиралиште Градска болница, на јавното паркиралиште Општа градска болница „8 Септември“, и во општина Аеродром на зона D3 позади ТЦ Бисер.
Велосипедот кој е изнајмен од една постојка, може да биде вратен на друга.