Собраниската Комисија за одбрана и безбедност на денешната седница заклучи дека Предлог-законот за изменување и дополнување на Законот за пожарникарство, во прво читање, е прифатлив и треба да се даде на натамошно читање.
Заменик-министерот за одбрана Арбен Љабеништа одбразложувајќи го Предлог-законот нагласи дека се работи за усогласување со Законот за територијална поделба на Република Македонија. Конкретно, се работи за противпожарните единици во Тетово и во Куманово, кои со измените треба да ги покриваат и Желино и Старо Нагоричане.
Според пратеникот Влатко Ѓорчев, со измените ќе се овозможи подобра операционализација.
– Локалната самоуправа во Куманово предводена од градоначалникот Зоран Дамјановски со години нема покажано никаков капацитет за справување со проблемите во општината, вклучувајќи ја и противпожарната заштита, која е на исклучително ниско ниво, истакна Ѓорчев, изразувајќи загриженост за, како што рече, неодговорноста на градоначалникот и запоставувањето на огромен број институции во општина Куманово.