Голем пожар синоќа избувна во манастирот „Света Богородица” во атарот на село Согле, јави Lisica.mk.
Околу 21.30 часот бил забележан оган во стариот конак, по што веднаш била известена противпожарната единица.
Сепак поради далечината, додека тие стигнале пожарот бил во полн ек.
Целосно е изгорен конакот, а штетата допрва треба да се проценува, но првичните претпоставки се дека таа е голема.
Изгорени се 300 метри квадратни покривна површина, кујна и инвентарот во собите.
Цела ноќ екипи од противпожарната единица и цистерна од Дервен биле на лице место, а 14 лица успеале огнот да го локализираат и изгаснат во 8 часот утринава.
Дефект во електричната инсталација се претпоставува дека е причината за појавата за пожарот. Сепак увидот на стручните лица треба да посочи кон виновникот.
Навремената интервенција на надлежните, ноќеска спречила огнот да се прошири на новиот реконструиран конак, кој пред два месеца беше осветен на голем народен собир и на манастирската црква.
Ако пожарот се префрлил на овие два објекта материјалната штета ќе била десетици пати повисока.