Десет илјади евра штета пријавил дека претрпел М.С.(66) откако ноќеска по полноќ избувнал пожар во неговата куќа во тетовското село Лешок, информираше портпаролот на СВР Тетово Марјан Јосифовски.
Според него, од огнот целосно е опожарена покривната конструкција на двоспратната куќа како и паркетот во двете соби на катот, шест прозорци, четири врати, еден телевизор, брачен кревет и други предмети додека значително се зачадени и ѕидовите од собите.
Со интервенција на тетовската противпожарна единица пожарот бил локализиран.
Во куќата подолго време не живеел никој бидејќи сопственикот М.С. живее во Скопје и според неговата проценка вкупната штета од пожарот е околу 10 илјади евра.
– Полицијата утринава извршила комплетен увид, го фотографирала објектот и се работи на откривање на причините за пожарот и утврдување на материјалната штета, рече Јосифовски.