На денешната седница на Советот на општина Куманово, советниците го изгласаа извештајот на буџетот за втор квартал 2017 година, заклучно со јуни, во кој е прикажана реализација на приходната и расходната страна до првата половина од тековната година.
– Планираните приходи се реализирани 37 отсто во однос на планот, пооделно по сметки како што се предвидени, а што се однесува до раходите, тековно-оперативните планирани се 40 проценти од планот, информираше раководителот на Одделението за финансии, Ирена Илиевска.
Како што појасни таа станува збор за трошоци кои се однесуваат на работата на општината и на петте јавни претпријатија во градот и услугите кои ги даваат кон граѓаните. Во однос на планот, исплатени се 15 проценти од капиталните расходи.
– Знаете дека општината веќе 4,5 години работи со задолжителна резерва и определен лимит, со блокирана жиро-сметка и се преземаат напори од градоначалникот и општинската администрација да се работи во рамки на тој лимит. Исплатата се врши во тие граници, поради тоа и реализацијата на расходната страна е помала во однос на планираното. Изградбата, како што можат да видат и граѓаните тече, се она што е изработено ќе биде исплатено во третиот и четвртиот квартал, изјави Илиевска.
Советниците од Коалицијата „За подобра Македонија“, пак велат дека и кварталниот извештај, неговата реализација, посебно во делот на капитални проекти, и особено во делот на изградба на улици, водоводна и канализациска мрежа покажува дека кога се носел буџетот е нереален и само ги отсликува желбите на локалната власт.
Советничката Христина Краиновиќ, вели дека како и секоја година, така и оваа наместо буџет од милијарда и шестотини илјади денари, ќе има само милијарда и триста колку е што реално.