Гевгелиските пожарникари во содејство со комуналните работници дури денеска успеаа да го совладаат разбеснетиот оган на градската депонија против кого борбата траеше скоро три дена.
Веднаш по пријавувањето на пожарот од страна на чуварот на депонијата, пожарникарите и комуналните работници беа на опожареното место, но гаснењето се одвиваше тешко поради големата површина зафатена со оган и енормната концентрација на чад.
Денеска огнот конечно беше изгаснат со употреба на специјална пена, а комуналците и понатаму продолжија да дејствуваат со вода затоа што на некои места пожарот се уште тлее.
Поради основано сомневање дека пожарот во депонијата е намерно подметнат, денеска општина Гевгелија до Основното јавно обвинителство поднесе кривична пријава против непознат сторител за загрозување на животната средина.