Постапката за утврдување места за плакатирање од страна на Општината, во Штип и во Кочани заврши денес. Политичките партии ги добија своите бројчиња за местата на кои ќе можат бесплатно да ги промовираат своите кандидати.
Во согласност со Изборниот законик, секоја општина е должна да утврди и да обележи места на кои политичките партии ќе можат да истакнуваат изборни плакати, без притоа да плаќаат надоместок за тоа.
Партиите од своја страна, пак, должни се совесно и навремено да поднесат барање за бесплатно место за поставување плакати. Непочитувањето на одредбите на Изборниот законик повлекува санкции.
Но, очигледно е дека одредени политички партии имаат проблем со ваквите законодавни „есапи“. Како што се вели: „Една слика, илјада зборови“.
Штип и Кочани се разбудија обвиени со плакати на коалицијата „За подобра Македонија“, а кон сторителите никој не изрече санкција.
Во исчекување на соодветна реакција од надлежните органи, останува онаа народната: „Државата за едни е мајка, а за други – маќеа“.
