Претседателот Ѓорге Иванов доставил барање за информација до Службата за општи и заеднички работи колкав буџет му следува по завршување на мандатот, потврдија од Владата на денешната прес-конференција.
-СОЗР има одговор дека висината е 8% од годишниот буџет предвиден за институцијата Претседател на Република Северна Македонија и дека во рамките на тој буџет треба да поднесат до СОЗР и барање за деловни простори, изјави владиниот портпарол Миле Бошњаковски.
До вчера во СОЗР не пристигнало барање, додаде Бошњаковски.
Според Законот за правата на Претседателот и неговото семејство по престанок на функцијата, тој има право на пензија чиј износ е еднаков со износот на платата што ја прима претседателот на државата, има право на канцелариски простор и најмногу три соработници. Има и право на лично обезбедување, како и право на користење на службено возило и возач.
