Jавен обвинител од Основното јавно обвинителство Скопје донесе Наредба за спроведување истражна постапка против едно лице поради постоење основано сомнение дека сторил кривично дело – Убиство, како и кривично дело – Убиство (во обид), се вели во соопштението на Јавното обвинителството.
Осомничениот на 02.03.2019 година, според скопското обвинителство, на локалниот пат меѓу селата Шишево и Глумово, со употреба на огнено оружје – полуавтоматски пиштол, со умисла лишил од живот едно лице, а уште едно се обидел да го лиши од живот.
-На критичниот ден, тој со својот автомобил го попречил движењето на автомобилот во кој се наоѓале двајцата оштетени заедно со уште едно лице – сведок на настанот и започнал вербална расправија заради претходно нарушени односи. Во момент кога еден од оштетените започнал да се враќа кон своето возило за да влезе, осомничениот му се приближил на кратко растојание и испукал кон него еден проектил од пиштолот, нанесувајќи му тешка телесна повреда во вид на прострелна рана, потенцираат од скопското обвинителство.
Дополнително од ова обвинителство истакнуваат дека после овој акт осомничениот тргнал да се пресмета и со вториот оштетен. Сведокот во овој настан се попречил меѓу нив, но осомничениот му наредил да се тргне.
-За тоа време, оштетениот започнал да бега, па осомничениот се стрчал кон него и испукал повеќе проектили, нанесувајќи му две огнострелни повреди во пределот на грбот. Како последица на овие повреди, оштетениот починал непосредно по приемот во болница, се вели во соопштението на Јавното обвинителство.
По ова, осомничениот се дал во бегство и го напуштил местото на настанот и една година беше недостапен на органите на прогонот. Надлежниот јавен обвинител до судијата на претходна постапка достави Предлог за определување мерка притвор за осомниченото лице поради опасност од бегство, можност да ги сокрие трагите на кривичното дело, да ја попречува кривичната постапка со влијание врз сведоците и вештите лица, како и да го повтори делото.