Дечињата треба да растат и да се развиваат во урбана општина, со нови и модерни игралишта наменети токму за нив. Поради ова, Општина Аеродром оваа есен инвестира средства во изградба на три нови игралишта во Горно Лисиче, Населба Лисиче и Мичурин. Овие игралишта се изведуваат во дворот на ООУ „Гоце Делчев“, на ул. „Мите Богоевски“ и во непосредна близина на „Танец“, известува Општина Аеродром.
Сите добиваат најсовремени реквизити, а како дел од завршната фаза ќе биде поставена и соодветна подлога. Активностите за изградба на новите детски катчиња се дел од есенската градежна офанзива чија цел е да обезбеди подобри услови за живот на повозрасните и игра и развој за помладите жители на Аеродром.
Во рамките на овие градежни активности се инвестираат буџетски средства во изградба на улици, паркинзи, детски и спортски игралишта во неколку населени места.
„Децата се иднината на Аеродром и наша обврска е да го дадеме најдобро од нас за нив. Поради ова општината обезбеди средства од буџетот кои ги намени за изградба на нови детски игралишта. Убеден сум и се радувам што овие игралишта ќе бидат нивно омилено место во општината. Со забрзано темпо и со голем број инвестиции за најмладите аеродромци ќе продолжиме и во следната 2023 година“, истакна градоначалникот Муцунски.
Изминатата година ја одбележаа инвестиции во проекти за сите категории на граѓани. Општината Аеродром и во следната година продолжува со активности за изградба на нови и реконструкција на постоечките детски и спортски игралишта. Во буџетот за 2023 година планирано е да продолжи изградба на објекти од ваков тип, се додава во соопштението на Општина Аеродром.